Ромит, Тоҷикистон, 16 августи соли 2024 - Дар доираи лоиҳаи USAID оид ба муҳоҷирати бехатар ва муқовимат бо савдои одамон, СБМ якҷоя бо Кумитаи кор бо ҷавонон ва варзиш лагери тобистонаи ҷавононро ҳамчун як қисми кӯшишҳои фаъол барои мубориза бо савдои одамон, ҳифзи ҷомеаҳои осебпазир ва пешбурди муҳоҷирати бехатар ташкил намуданд. Ин чорабинӣ, ки дар доираи маъракаи Рӯзи ҷаҳонии мубориза бо савдои одамон (WDATIP) ва бахшида ба Рӯзи байналмилалии ҷавонон баргузор шуд, 43 роҳбари ҷомеаи ҷавононро барои муҳокима ва фикрронӣ оид ба муҳоҷирати бехатар ва роҳҳои пешгирии савдои одамон ҷамъ овард.

Лагери тобистона ба тақвияти қобилиятҳои роҳбарии роҳбарони ҷавони ҷомеаҳо равона шуда буд, то онҳо дар гузаронидани сессияҳои иттилоотӣ дар дохили ҷомеаҳои худ, махсусан миёни ҷавонони осебпазир аз минтақаҳои деҳот, дар бораи муҳоҷирати бехатар ва хатарҳои савдои одамон нақши муҳим бозанд. Ин чорабинӣ инчунин бо мавзӯи умумии маърака: «Ҳеҷ як кӯдакро дар мубориза бо савдои одамон танҳо нагузоред» мувофиқ карда шуд.

Барномаи панҷрӯзаи таълимии лагери тобистона сессияҳои интерактивии омӯзиширо дар бар мегирифт, ки пас аз он машқҳои амалӣ гузаронида мешуданд. Мутахассисон аз Созмони Байналмилалии Муҳоҷират (СБМ), Вазорати корҳои дохилӣ (ВКД), Омбудсмени ҳуқуқи инсон сессияҳои назариявиро гузарониданд. Сессияҳои амалӣ ба иштирокчиён имкон доданд, ки донишҳои бадастовардаи худро тавассути бозиҳои нақшофарӣ, кори гурӯҳӣ, баҳсҳо ва муҳокимаҳо татбиқ кунанд.

«Садоқати Тоҷикистон ба мубориза бо савдои одамон ва тақвияти қобилиятҳои роҳбарии ҷавонон шоистаи таҳсин аст. Бо кӯшишҳои муштарак мо метавонем муҳити бехатарро эҷод кунем ва таъмин намоем, ки ҳеҷ як кӯдак дар мубориза бо савдои одамон танҳо намонад», - гуфт роҳбари миссияи СБМ дар Тоҷикистон, ҷаноби Виктор Лутенко, ки дар лагери тобистона иштирок дошт.

Интизор меравад, ки роҳбарони ҷавоне, ки дар лагери тобистона иштирок карданд, сессияҳои иттилоотӣ гузаронида, огоҳиро миёни муҳоҷирони эҳтимолӣ дар ҷомеаҳои худ баланд бардоранд. Бо ин роҳ, онҳо ба ҳифзи ҷомеаҳои ҳошиянишин аз хатарҳои муҳоҷирати ғайриқонунӣ ва савдои одамон саҳми назаррас мегузоранд.

Ба гуфтаи иштирокчиён, чунин чорабиниҳо барои худшиносӣ ва барқарор кардани робитаҳо бо дигар ҷавонон муҳиманд. «Ташаккур ба ҳукумати Тоҷикистон ва Ташкилоти байналмилалии муҳоҷират барои ташкил кардани чунин чорабинии ҷолиб, ки дар он мо роҳбарони ҷавонро аз тамоми минтақаҳои Тоҷикистон ва ҳатто Афғонистон вохӯрдем. Ин ба таҳкими ҳамбастагии иҷтимоӣ миёни ҷавонони кишварҳои мо мусоидат мекунад», - гуфт Мурсал Назарӣ, иштирокчии лагери ҷавонон аз Афғонистон.

Пас аз чорабинӣ, панҷ гранти хурд барои беҳтарин идеяҳо, ки ба гузаронидани сессияҳои иттилоотӣ дар бораи муҳоҷирати бехатар ва муқовимат бо савдои одамон дар ҷомеаҳои онҳо равона шудаанд, дода мешаванд. Ин сессияҳо ба ҷавонони осебпазир ва аудиторияҳои деҳот таҳти шиори умумии «Ҳеҷ як кӯдакро дар мубориза бо савдои одамон танҳо нагузоред» равона мешаванд. Аризаҳо аз ҷониби СБМ арзёбӣ ва интихоб карда мешаванд, ки инчунин дастгирии ибтидоӣ ва роҳнамоӣ барои довталабони муваффақро таъмин мекунад.

Барои маълумоти бештар, лутфан бо nshekhova@iom.int тамос гиред