Созмони Байналмиллаии Муҳоҷират (СБМ) дар Осиёи Марказӣ конфронси дурӯзаеро таҳти унвони «Мубориза бо қаллобии онлайн ва киберҷиноятҳо, ки бо ҷалби байналмилалии корӣ алоқаманданд» баргузор намуд. Дар ин чорабинӣ мансабдорони баландпоя аз Вазоратҳои Корҳои Дохилӣ ва Вазоратхои Меҳнату Муҳоҷирати кишварҳои Осиёи Марказӣ, Сафорати Британияи Кабир дар Бишкек инчунин намояндагони СБМ ширкат варзиданд. Ҳадафи конфронс таҳкими ҳамкориҳои муштарак дар ҳалли мушкилоти афзояндаи қаллобии онлайн ва киберҷиноятҳо дар равандҳои ҷалби байналмилалии корӣ мебошад.

Намояндагони ҳукуматҳо ҳолатҳои қаллобӣ ва киберҷиноятҳоро, ки дар кишварҳои худ сабт шудаанд, муаррифӣ намуда, чораҳои андешидашуда барои мубориза бо ин мушкилотро шарҳ доданд. Конфронс дар доираи лоиҳаи «Муҳоҷирати бехатари коргарони мавсимӣ аз Осиёи Марказӣ ба Британияи Кабир» баргузор гардид.

Ҷаноби Парвиз Максатуллозода, Муовини Сардори Раёсати Муҳоҷирати аҳолӣ дар Вазорати Меҳнат, Муҳоҷират ва Шуғли аҳолӣ, дар бораи намудҳои қаллобии онлайн, ки дар Тоҷикистон сабт шудаанд, ва талошҳои вазорат барои пешгирии чунин қаллобӣ, маърӯзаи фарогир пешниҳод намуд. Намояндагони СБМ дар Тоҷикистон дар якҷоягӣ бо намояндагони ҳукумати Тоҷикистон фаъолона дар муҳокимарониҳо иштирок намуда, ба ташаббус саҳми арзишманд ва таҷрибаи худро гузоштанд.

Виктор Лутенко, Сардори Намояндагии дафтари СБМ дар Тоҷикистон, изҳор дошт: «Пешгирии қаллобӣ дар ҷалби байналмилалии муҳоҷирати меҳнатӣ барои Тоҷикистон хеле муҳим ва саривақтӣ мебошад. Дар ин ҷо, дар Бишкек, мо бо ҳамкорон аз Қазоқистон, Қирғизистон ва Ӯзбекистон таҷрибаҳои беҳтарин ва дарсҳои омӯхташударо аз минтақаи Осиёи Марказӣ муҳокима намуда, инчунин усулҳои пешрафта дар таҳқиқ ва пайгирии қаллобии онлайн дар муҳоҷирати меҳнатиро меомӯзем. Умедворам, ки ин чорабинӣ талошҳоро дар саросари Осиёи Марказӣ тақвият бахшида, муҳоҷиронро дар ҷустуҷӯи кори хориҷӣ бехатар мегардонад».

Ин талоши ҳамкорӣ садоқати ҳукуматҳои Осиёи Марказӣ ва СБМ-ро барои ҳифзи коргарони муҳоҷир ва таъмини равандҳои ҷалби байналмилалии корӣ, ки бехатар, ахлоқӣ ва шаффоф мебошанд, таъкид менамояд

Барои маълумоти иловагӣ, лутфан бо мо тамос гиред: Нилуфар Шехова, nshekhova@iom.int